БИШКЕК, 3-май — Sputnik. Үч кишини кармап алган айыл тургундары аларды бала уурдоого аракет кылды деп айыптап, ур-тепкиге алып жаткан видео социалдык тармактарда жана мессенджерлерде тарап жатат.
Видеодо үч киши дудук жана дүлөй экенин түшүндүрүүгө аракет кылып жатканын көрүүгө болот. Бирок жергиликтүү тургундар ишенбей, аларды сабаганга аракет кылышкан.
Ош облустук ички иштер башкармалыгы окуя 28-апрелде Алай районунун Корул айылында болгонун билдирди. Аталган райондун бир тургуну жана Ноокат районунун эки тургуну машина менен айылга келишкен.
"25 жаштагы кишилер Орозо календарын сатып жүрүшкөн. Эшек минип жүргөн баланы көрүп, аны токтотуп, эшекти минип сүрөткө түшүү үчүн акча сунушташкан. Бирок алар өздөрүнүн каалоосун толук түшүндүрүп бере алышкан эмес. Бала коркконунан качып кеткен", — дешти милициядан.
Укук коргоо органдарынын өкүлдөрү таяк жеген кишилер чынында эле дүлөй экенин аныкташкан. Аталган факты Жоруктар жана кылмыштардын бирдиктүү реестрине катталып, жергиликтүү тургундарга карата Кылмыш жаза кодексинин 266-беренеси ("Бейбаштык") боюнча сотко чейинки тергөө амалдары башталды.
