БИШКЕК, 22-сен. — Sputnik. Москвадагы ресторандардын биринде ок чыгарган адам Кыргызстандын жараны экенин КРдин Россиядагы элчилиги жергиликтүү укук коргоо органдарына таянуу менен билдирди.
Маалыматка ылайык, Москва шаарындагы "Ысык-Көл" кафесинин жанында эки кыргызстандык уруша кетишип бири экинчисин көзгө аткан.
"Окуя 19-сентябрь күнү саат 7:00дө болгон. Колго түшкөн жаран травматикалык тапанча менен жабырлануучуну көзгө атып жиберген. Ал жерге ыкчам топ барып курал колдонгон адамды кармаган. Ок жеген адам №36 шаардык клиникалык ооруканага жеткирилип, тиешелүү медициналык жардам көрсөтүлүп, бирок ооруканага жаткырылган эмес", — деп жазылат маалыматта.
Элчилик жергиликтүү укук коргоо органдарына окуянын катышуучуларынын аты-жөнүн тактоо жана кандай чара көрүлгөнү тууралуу маалымат алуу үчүн билдирүү жөнөтүп, ишти көзөмөлгө алды.
