Ажал кимге кайсы күнү келерин эч ким билбейт. Бүгүн көргөн дени сак кишиңди эртең эле таппай калуу кандай коркунучтуу. Жол кырсыктары… Адам өмүрүн алган жол кырсыктарын жазган сайын жолдон өткөндөн, маршрутка, унаага түшкөндөн, ал тургай аялдамада тургандан коркуп калдык. Адыраңдап айдаган айдоочу бир күнү сенин да өмүрүңө забын болушу толук ыктымал.
Буга мисал кечээки жүрөк үшүн алган жол кырсыгы. Анда "Асанбай" кичи районунда 25 жаштагы айдоочу унаасын башкара албай аялдамага кирип кетип, анда турган аялды өлтүрө сүзүп салган. Кырсык таңкы саат алтыда катталган. Байкуш аял таң атпай балдарымды багайын деп жумушка шашып баратса керек… Ажалына шашып чыккан турбайбы.
Жүүнү бош адамдар кайгылуу окуя же жаман кабар укса эле шолоктоп жатып калат экенбиз. Психоневрологиялык жайдагы Мирлана Камбарованын тагдыры жүрөктөн жөн өткөн жок. Мектепте жакшы окуп, бардык жагынан алдыда жүргөн кыз кийин кандайдыр бир себептер менен Чым-Коргонго түшүп калыптыр. Тарткан сүрөттөрүн, жасаган эмгегин көрүп "аттиң, тагдыр адамды кандай гана калчабайт" деп үшкүрүнүп кала бересиң.
Аптанын башталышында эле жаман жаңылык менен маанайыңарды бузуп алдым окшойм. Бирок мындай окуяларды да эске ала жүрүш керек.
Расмий кабарларга өтсөк, өлкө башчыбыз Сооронбай Жээнбеков кечээ иш сапары менен Түркия мамлекетине барды. Түрк эли президентти ардак кароол менен тосуп алып, иш сапардын жүрүшүндө бир катар маселелер талкууланды. Ал эми экс-президент Алмазбек Атамбаев Кытайда жүрөт. Кандай максатта ал жакка кеткенин бул материалдан окуп алыңыз.
Кабарчыбыз Гүлдана Талантбекованын кикбоксчу Улан Касымбеков менен болгон маегин окуп коюңуздар.
Эми жайдын ортосуна чейин борбор калаада жол тыгыны укмуш болот окшойт. Себеби мэрия учурда калаадагы бир топ борбордук көчөлөрдү оңдоп жатат. Бүгүн да жол тыгындын кесепетинен жумушка, окууга кечигип баргандар көп болсо керек.
Валюта наркы. Сомдун баасы долларга карата орто эсеп менен 68.47 (сатып алуу) жана 68.88 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 41.80 сом, Аи-95 үлгүсүндөгү бензин 44.50 сом, ал эми дизель майы 42.50 сомдон сатылууда.
Соңку сөз ордунда. Бөөдө кырсыктардан сак бололу!
Аманчылык каалап, Таалайгүл Усенбаева.
