БИШКЕК, 28-фев. — Sputnik. 2018-жылы ажылык сапарга барууга өлкө боюнча 6895 адам катталды. Бул тууралуу муфтияттын маалымат кызматы кабарлады.
Билдирүүгө ылайык, ажылыкка талапкерлерди серверге каттоо иши бүгүн, 28-февралда кечки саат 17:00дө токтотулган.
"Зыярат кылууга Баткен облусунан 628, Ош облусунан 2548, Ош шаарынан 782, Жалал-Абаддан 1313, Чүй өрөөнүнөн 965, Талас облусунан 94, Нарындан 45, Ысык-Көл облусунан 73 жана Бишкек шаарынан 447 адам катталган", — деп жазылат маалыматта.
Быйыл ажылык серверге катталгандардын саны берилген квотадан 1580ге ашык болгон. Мындан улам квотадан ашкан талапкерлер 2019-жылдагы ажылык сапарына баруу үчүн аймактык кезекке турушу керектиги кошумчаланган.
Буга чейин ажыга барчу зыяратчылардын кийимин тикчүлөр да тандалган.
