БИШКЕК, 23-фев. — Sputnik. Кыргызстан мусулмандар дин башкармалыгы быйыл ажыга барчу зыяратчылардын формасын тиге турган тараптар ортосунда сынак өткөрүп, жеңүүчүлөрдү аныктаганын аталган мекеме билдирди.
Маалыматка ылайык, ажылыкты уюштуруу боюнча республикалык штабдын мүчөлөрү кийимдин үлгүсү, кездеменин сапаты менен таанышып, форманын ыңгайлуулугуна, коопсуздук эрежелеринин сакталышына карашкан.
"Жалпысынан сынакка тогуз талапкер ат салышты. Баасынын төп келиши, сапаттуулугун, дизайндык өзгөчөлүгүн жана коопсуздук эрежелерин эске алып, Мээрим Таалайбекова жана Динара Акматбаева аттуу жеке ишкерлер жеңүүчү деп табылды", — деп айтылат билдирүүдө.
Таалайбековага аялдардын, ал эми Акматбаевага эркектердин кийимин тигүү тапшырылды.
Эскерте кетсек, буга чейин зыяратчыларды ажылыкка Сауд Аравиянын Flynas авиакомпаниясы ташый турганы белгилүү болгон.
