БИШКЕК, 5-дек. — Sputnik. Аалымдар кеңешинин мүчөсү Чубак ажы Жалиловдун экинчи аял алышы боюнча милицияга чакырылгандан кийин Whatsapp тайпаларда белгисиз адамдар тарабынан "милициялар аны кыйнап жатыптыр, 6-декабрда аалымды колдоо үчүн Жогорку Кеңештин алдына митингге чыгабыз" деген билдирүүүлөр тарап жатат.
Анда чоң митинг өтөрү, анын башкы урааны "Чубак ажыдан колуңарды тарткыла" болору айтылууда. Тексттин авторлору дин аалымын Бишкек милициясы 15 саат кармап, керек болсо суу да бербегенин жазып чыгышты. Андан тышкары, тартип сакчылары Жалиловду "экинчи аял алган жокмун" деп күчтөп жаздырып алышканын келтиришет.
Бирок Чубак ажынын өз атын атагысы келбеген жардамчысы бул маалыматтарды четке кагып, эч кандай митинг уюштуруу пландалбаганын айтты. Интернетте дин аалымынын жардамчысыбыз дегендер кыргызстандыктарды чагымчылдыкка алдырбоого чакырган билдирүүлөрдү таратып жатышат. Алар Жалиловго күч органдары тарабынан ыдык көрсөтүлгөн деген маалыматты четке кагып, экс-муфтий ар дайым митингдерге каршы болуп келгенин жазышууда.
Ал арада бул маселе УКМК тарабынан көзөмөлдөнүп жатканын ведомствонун маалымат катчысы Рахат Сулайманов Sputnik Кыргызстан агенттигине билдирди.
"Биз бул маселеге көз салып турабыз. Эгерде мыйзамга каршы келчү чакырыктар ташталса, алар мыйзам чегинде жоопкерчиликке тартылышат", — деди Сулайманов.
Ал эми Бишкек ШИИБдин маалымат кызматы Чубак ажы Жалилов кечээ, 4-декабрда экинчи ирет милицияга чакырылганын маалымдады. Анда ал саат 14.00дө келип бир саатка чукул аңгемелешүүдөн кийин кайра коё берилген.
