Бычак жеп, көчөдө жан берген милиция. Бишкектиктер үрөй учурган окуя тууралуу 27-октябрда эртең менен угушту. 26-октябрга караган түнү Бишкектин Бөкөнбаев жана Исанов көчөлөрүнүн кесилишинен милиция кызматкеринин сөөгү табылган. Кылмышкердин колунан бычакталып каза болгон милициянын кызматкери 25 жаштагы Уларбек Майрамбеков болуп чыкты
Маркум Биринчи Май райондук милициясынын криминалдык кызматында иштечү экен. Ал мурунку күнү жасап бүткөн иштеринин эсеп-чотун берип, табелдик куралын тапшырып кубанган тейде эмгек өргүүсүнө кеткен. Иштен чыгып кесиптештерин Бишкектин ичиндеги бир жерге алып барууну суранып, ал жакта калган. Ал эми видеодон түн жамынган бирөө ага кантип бычак ургандыгын көрүүгө болот.
Ички иштер министрлиги сержант менен старшинанын чогуу иштеп жүргөнүн билдирди.
Чолпон-Атада кырсыктаган инспектор. Июнь айынын соңунда Чолпон-Ата шаарында Кайгуул милиция кызматынын инспекторун иш учурунда көчөдө кетип бара жаткан Subaru Forester үлгүсүндөгү унаа коюп кетип, ал ооруканадан көз жумду.
Жүрөккө сайылган бычак. Июндун акыркы күндөрүндө, шаршемби күнү ИИМдин Свердлов району боюнча Адистешкен мамлекеттик күзөт кызматында иштеген милиция кызматкери аял кишинин колунан каза тапты. Маалыматта ал 17 жаштагы кызга сезимин билдирип, анын колун сураган. Окуя кечки саат 23.50лөр чамасында болгон.
"Ал кызга ашыктык сезимин билдирип, эч нерседен коркпой турганын айткан. Кийин экөө белгисиз себептер менен урушуп кеткен. Жигит кыздын колуна бычак карматып, сайып салуусун суранган. Натыйжада кыз милициянкызматкеринин көкүрөгүнө бычак урган", — деп билдирген ИИМдин маалымат кызматынан.
Ал ооруканага жеткирилгени менен алган жараатынан каза тапкан. Милициядан маркум тирүү болгондо август айында күзөт кызматында иштеп жатканына бир жыл толмоктугун кошумчалашты.
Сөөгү үч күндөн кийин табылган подполковник. Ошто Баңгизаттарын көзөмөлдөө боюнча мамлекеттик кызматта иштеген подполковниктин сөөгү 24-мартта автоунаанын ичинен табылган. Ал 21-март күнү үйдөн чыгып кеткен бойдон кайтып келген эмес. Үч күндөн кийин сөөктү Учар айылынын Набережная көчөсүндө жолдун боюнда токтоп турган көк түстөгү Mitsubishi унаасынан табышкан.
Кыргыз милициясы түптөлгөндөн тарта кызмат кылып жаткан учурунда 272 кызматкери өмүрү менен кош айтышкан. Быйыл, 2017-жылы, милиция өзүнүн түптөлгөндүгүнүн 93 жылдыгын белгилеп жатат.
