БИШКЕК, 25-мар. — Sputnik. Ош шаарындагы подполковникти өлтүрүүгө шектелген жаран мындай кадамга өз жубайын ал адамдан кызганганы үчүн барган деген версия каралып жатат. Бул тууралуу Ош шаардык ИИБдин маалымат катчысы Замир Сыдыков Sputnik Кыргызстан агенттигинин аймактык кабарчысына билдирди.
Анын айтымына караганда, мындай оор кылмышка шектүү катары бир үй-бүлө мүчөлөрү кармалды.
"Тагыраагы, төрт адамдын экөө эрди-катын, алардын баласы жана аялдын бир тууган иниси болуп чыкты. Алдын ала маалымат боюнча шектелүүчү аялын подполковниктен кызганып, ушундай кадамга барган. Ага анын баласы менен жубайынын иниси жардам бериши ыктымал деген версия каралууда", — деди Сыдыков.
Эске салсак, милиция кызматкери 21-март күнү үйдөн чыгып кеткен бойдон кайтып келген эмес. Ал эми Ош шаардык ИИБдин маалымат кызматы анын сөөгү Учар айылынын Набережная көчөсүндө жолдун боюнда токтоп турган көк түстөгү Mitsubishi үлгүсүндѳгү унаадан табылганын билдирген.
Шектүүлөр 24-март күнү кечинде кармалган.
