БИШКЕК, 23-окт. — Sputnik. Быйыл кышта кыргызстандыктар көмүр менен толук камсыз болорун Мамлекеттик өнөр жай, энергетика жана жер казынасын пайдалануу комитетинин төрага орун басары Кубан Мырзаканов Sputnik Кыргызстан агенттигинин мультимедиалык борборунда өткөн маалымат жыйында билдирди.
Анын айтымында, бул жаатта иштер кадимки тартипте жүрүүдө. 15-ноябрга карата бардык казан мештер менен социалдык мекемелер көмүр менен толук камсыздалат.
"Карьерлердин бардыгы планга ылайык иштеп жатат. Бишкек ТЭЦине көмүр туруктуу жеткирилүүдө. Болгону көмүрдү ташып келүүгө автотранспорт жетишпей жатат, аны буюрса чечтик. Казакстандын көмүрүн алып келүүдө бир аз көйгөй бар. Расмий тыюу жок, болгону вагондордун тартыштыгы жаралууда. Бирок маселе чечилүүдө. Кыргызстандын көмүрү элди толук камсыздоого жетет", — деди Мырзаканов.
Көмүрдүн бир тоннасынын орточо баасы 3500 сомдон 6500 сомго чейин жетет.
Бишкектин көмүр сатылып жаткан аймактарын Sputnik Кыргызстан агенттиги даярдаган картадан окуңуз>>
