Көмүрдүн баасын көтөрүүгө эч кандай негиз жок экендигин Мамлекеттик өнөр жай, энергетика жана жер казынасын пайдалануу комитетинин төрага орун басары Кубан Мырзаканов Sputnik Кыргызстан агенттигинин мультимедиалык борборунда өткөн маалымат жыйында билдирди.
Анын айтымында, быйыл кышта кыргызстандыктар көмүр менен толук камсыз болот.
"Казакстандын көмүрүн алып келүүдө бир аз көйгөй бар. Расмий тыюу жок, болгону вагондордун тартыштыгы жаралууда. Бирок маселе чечилип жатат. Кыргызстандын көмүрү элди толук камсыздоого жетет. Монополияга каршы күрөшүү агенттигинин өкүлдөрү кирген өкмөттүк топ бар. Алар көмүр саткан жерлерди кыдырып, бааларга көз салууда", — деди Мырзаканов.
Ал көмүрдүн бир тоннасынын орточо баасы 3500 сомдон 6500 сомго чейин жетерин кошумчалады.
