Кыргызстандын тоолорунан ажал тапкан чет элдиктер. Акыркы 10 жылдагы кырсыктар

БИШКЕК, 29-сен. — Sputnik. Кыргызстандын тоосунда жоголгон израилдик турист Хилла Ливненин сөөгү табылганын ӨКМ башчысы Кубатбек Боронов билдирди.

Түрдүү эсептөөлөр боюнча Кыргызстанга жыл сайын тоо туризмине кызыгып келген туристтердин саны 15 миңден 18 миңге чейин жетет. Алардын арасынан эң аз дегенде үч турист тоодо каза болот. Sputnik агенттиги Кыргызстандын тоолорунда көз жумган туристтер тууралуу маалыматтарга саресеп салып көрдү.

2007-жылы Чүй облусундагы Эркин Корея чокусун багындырууга бел байлаган украиналык альпинист каза болгон.

Ошол эле жылы төрт альпинист Денис Зарипов, Руслан Бакиров, Евгений Логинов жана Оксана Мовчан деңиз деңгээлинен 3820 метр бийиктикте жайгашкан Домашний чокусуна чыгып баратып аскадан тайып каза болушкан.

2008-жылы деңиз деңгээлинен 6800-6900 метр бийиктикте жайгашкан Ленин чокусуна чыккан чех альпинисти Мария Шмелерова дайынсыз жоголгон. Анын сөөгү табылбай калган.

Дал ушул жылдын жай айында Хан-Теңир чоркусун багындырам деген поляк альпинисти Матеуш Олекси көз жумган. Адистер ал кар көчкүнүн алдында калганын аныкташкан. Ал эми жай айынын аягында Жеңиш чокусунун аймагында Украинанын жараны дайынсыз жоголуп, сөөгү табылган эмес.

2015-жылы Ала-Арчадагы чокулардын бирине чыгууга аракет кылган үч испаниялык альпинист каза тапкан. 10 кишиден турган тайпа тоодон кулаган таш алдында калган. Көз жумгандардын арасында Валенсиянын тургуну Алехандро Васедо Чафер (туулган жылы белгисиз), Торогана шаарынын тургуну 19 жаштагы Родригес Виллар жана Жерондун жашоочусу 24 жаштагы Джозеф Катрино Кабалерия болгон.

Ошол эле жылдын февраль айында Ысык-Көл облусунда Россиядан лыжа тепкени келген эки турист аял көчкү алдында калган. Бирөөсү куткарылып, экинчиси набыт болгон.

2015-жылдын июлунда Одесса чокусунан түшүп келе жаткан үч россиялык спортчу Павел Марковских, Сергей Шпиз менен Илья Поселяничев каза тапкан. ӨКМ алардын мүрт кеткенин маалымдаган.

2017-жылы Кыргызстан менен Тажикстандын чек арасындагы тоолордо бир нече киши өмүрү менен кош айтышкан. Алардын арасында белгилүү россиялык альпинист Юрий Курмачев болгон. Маалыматта анын Ленин чокусуна чыгуу аракети тууралуу айтылат.

Ошол эле жерде Ирандан келген турист да каза тапкан.

Быйыл жайында түркиялык альпинист Хакан Кошкун Хан-Теңир чокусун багындыруу учурунда каза болгон. Маалыматка ылайык, Кошкундун жүрөгү кармап калган.