БИШКЕК, 29-сен. — Sputnik. Сары-Челек коругунда жоголуп кетип, алты күндөн бери изделип жаткан израилдик турист Хилла Ливненин асканын арасында калган сөөгүн россиялык туристтер дрондун жардамы менен тапкан. Бул тууралуу Сары-Челек мамлекеттик коругунун жетекчиси Эсеналы Ормоналиев Sputnik Кыргызстан агенттигинин кабарчысына билдирди.
Анын айтымында, буга чейин Израилден келген куткаруучулар да дрон менен карап таппай коюшкан.
27 Аяк оона 2017, 20:15
"Кечээ кечинде Россиянын кайсы бир туристтик клубунан келдик деп бир нече адам келди. Алар Сары-Челек көлүн дрон менен тартып алууга уруксат берүүбүздү суранышты. Биз алты күндөн бери жоголгон туристти таппай жатканыбызды айтып, жардам сурасак алар дароо макул болушту. Ошентип бүгүн саат 10до издегени чыгып, бир жарым саат мурда таап алышты. Турист кыз жоголгон жерден алыс эмес жерден аскадан кулап, таштын арасына кыпчылып калган экен. Буга чейин Израилден келген куткаруучулар өздөрү дрон менен карап таппай коюшкан", — деди Ормоналиев.
Сөөктүн кайсы жерде экени аныкталары менен аймакка ӨКМдин куткаруучулары чыгып кеткен.
Ал эми өзгөчө кырдаалдар министри Кубатбек Боронов кыздын аскадан кулап кеткенин билдирген.
Израилдик турист табылган жер. Карта
