БИШКЕК, 3-июл. — Sputnik. Кыргызстандын президенттигине аттанууга белсенген дагы төрт талапкер арызын берди. Бул тууралуу Sputnik Кыргызстан агенттигинин кабарчысына Борбордук шайлоо комиссиясынан билдиришти.
Маалыматка караганда, БШКга бүгүн өзүн өзү талапкер катары көрсөткөн төрт адам кайрылган. Алар: камактагы Садыр Жапаров, пенсионер Замира Муратбекова, убактылуу ишсиз Санжарбек Энназаров жана "Сүймөнкул Чокморов" коомдук фондунун жетекчиси Сагынбек Абдрахманов.
Бул арыздарды кошкондо БШКга президентик шайлоого аттанам деген 16 талапкер арызын берген. Алар — Темир Сариев, Өмүрбек Текебаев, Назарбек Нышанов, Арстанбек Абдылдаев, Рита Карасартова, Бакыт Дегенбаев, Сайнидин Султанидинов, Камила Шаршекеева, Бакыт Төрөбаев, Турсунбай Бакир уулу, Өмүрбек Бабанов жана Таалатбек Масадыков болду.
Шайлоо үстүбүздөгү жылдын 15-октябрында өткөрүлөт. Талапкерлерди көрсөтүү 1-августка чейин созулат.
