БИШКЕК, 5-апр. — Sputnik. Санкт-Петербургдагы метродогу жардырууга шектелип жаткан Акбаржон Жалиловдун мурдагы класс жетекчиси Фатима Кадырахунова Акбаржон мектепте жакшы окубаса дагы жоош бала болгонун Sputnik Кыргызстан агенттигинин аймактык кабарчысына айтып берди.
Кадырахунова Токтогул Сатылганов атындагы №26 мектепте 2005-2009-жылдар аралыгында (5-8-классында) Жалиловдун класс жетекчиси болгонун билдирди.
"Жалилов сабактарын "3", "4" деген баага окуган. Шоктугу жок, жоош бала болчу. Эмнеге тапшырмаларын аткарбай келгенин же сабакка кечигүү себептерин сураганда тез эле көзүнө жаш тегеренип кетчү. Көбүнчө адабият сабагына кызыкчу. 8-класстан тарта орус адабиятына жана информатика сабагына дилгирлиги байкалган", — деди Кадырахунова.
"Башка балдардай болуп жума намазга баруу үчүн сабактан суранган эмес. Достору менен жакшы мамиледе болчу. Чогулуштарга апасы келип турчу "балаңыз жакшы окубайт, бирок бейбаш эмес" деп айтканым бар. Анын мындай кадамга барганына ишене албай турам", — деди мугалим.
Ал эми шектүүнүн жеңеси Сурая Жалилова Акбаржон тил алчаак, абдан жакшы жигит экенин айтып берди.
"Чынымды айтсам, азыркы болуп жаткан окуяга такыр ишене албай жатабыз. Акбаржон биз менен үч жылдай чогуу жашаган. Жөнөкөй, абдан жакшы жигит болчу. Анын намаз окуганын такыр көргөн эмесмин. Жыртык жынсыларды кийип, өзүн шаардык балдардай алып жүрчү. Аны акыркы жолу үч жыл мурда көргөм. Быйыл февраль айында дагы келип кетти деп уккам, бирок көргөн эмесмин", — деди Жалилова.
Анын айтымында, шектүүнүн апасы эмне болгонун биле албай, ыйлаган бойдон Россияга кеткенин кошумчалады.
Белгилей кетсек, терактынын айынан 14 киши каза таап, 49 адам ар түрдүү жаракаттарды алган.
