Санкт-Петербургдагы станцияларга эки бомба коюлганы, анын бирөө жарылып, экинчиси зыянсыздандырылганы белгилүү болду. Мунун кесепетинен 14 киши каза болду. Кыргызстандан барган журналист Марат Арнис жардыруу болгон маалда ошол жерде жүргөнүн айтып, бардык окуя анын көз алдынан өткөнүн белгиледи.
— Окуя болгон жерге канчалык жакын элеңиз?
— Болжол менен бир аялдаманын аралыгында болчумун.
— Жардырууну сездиңизби?
— Алгач эмне болуп жатканын түшүнгөн жокмун. Полиция, өрт өчүрүүчүлөрдүн, Тез жардам унааларынын сиреналары кулактын кужурун алып жиберди. Андан кийин эле кесиптештер, туугандар чала башташты. Шаар курчоодо калгандай болду, анткени окуя болгон жердин баары тосулуп калыптыр.
— Жакын эле жерде экинчи бомба бар экенин укканда корктуңузбу?
— Тескерисинче биринчи аянттан бомба табылганын уктум, жардыруу андан кийин болду. Мага маалымат ушундай ыраатта жетти. Кийинчерээк автобус жарылды деп уктум, бирок бактыга жараша ал жалган болуп чыкты.
— Жардыруу болгондо элдин реакциясы кандай болду?
— Эч ким аябай деле чуу чыгарган жок. Ушул нерсе мени абдан таң калтырды. Эч кандай паника болгон жок. Эл тынч эле окуя болгон жерден кетип жатты. Буга чейин бул шаарда терактылар болгондуктан, адамдар көнүп калган окшойт. Көптөр жардам берүүгө аракет кылышты, бирок полиция менен ӨКМ кызматкерлери эч кимди кое берген жок.
— Жардыруудан кийин сиздин аракеттериңиз кандай болду?
Кечинде жумуштан үйгө жетүү кыйын болду. Телефондорго такси кызматтары бекер иштей турганы тууралуу билдирүүлөр келе баштады. Акы төлөнүүчү жолдордогу шлагбаумдар ачылды. Айдоочулардын көбү кишилерди салып кетип жатышты, коомдук транспорт бекер ташыды.
— Бул окуядан кийин метродон жүрүү, эл көп чогулган жерге баруудан кооптонуп калсаңыз керек?
— Чынын айтсам, коркунучтуу эле. Буга чейин адамдар полиция менен ӨКМдин теракт тууралуу эскертүүлөрүнө олуттуу деле көңүл бурган эмес. Айрымдар көп эки жакка чыкпай тургандыктарын айтып жатышат. Этият болуп калат окшойбуз.
