БИШКЕК, 4-мар. — Sputnik. Санкт-Петербургдагы метродогу жардырууга шектелип жаткан Акбаржон Жалиловдун апасы жашаган конуштун кварталдык комитетинин башчысы Анваржон Дадабаев аталган үй-бүлө тууралуу Sputnik Кыргызстан агенттигинин кабарчысына маек куруп берди.
Дадабаевдин айтымында, шектүүнүн апасы Ош шаарына караштуу Амир Тимур аймактык кеңешинин Калинин конушунда 2012-жылдан бери жашайт.
"Бул үйдө терактыга шектелип жаткан баланын апасы Адинахан Жалалова жашайт. Анын эки баласы, бир кызы бар. Күйөөсү менен улуу баласы Россиянын жарандыгын алышкан. Ал эми кызы турмушта. Жолдошу менен улуу баласы алты айда же бир жылда үйүнө бир келип турчу. Өзү кичүү баласы менен бул жакта жашайт", — деди ал.
Дадабаевдин айтымында, үй-бүлө мүчөлөрү башкалардан айырмаланбаган, катардагы эле жарандар.
"Бул баланын мындай ишке барышы мүмкүн эмес. Ишене албайм. Себеби анын үй-бүлөсү динге ашыкча берилген эмес. Кадимкидей эле светтик адамдар", — деп кошумчалады Дадабаев.
"2010-жылдын аягында Акбаржон менен анын атасы Россиянын жарандыгын алуу боюнча кайрылышкан. Тиешелүү текшерүүлөрдөн кийин 2011-жылдын февраль айында биз ага паспорт бергенбиз. Бул "ата-эне" беренеси боюнча ишке ашкан. Тагыраагы, эгер жарандын апасы же атасы Россиянын жараны болсо анын баласына жарандык берилет", — деди Свистин.
Эске салсак, Санкт-Петербургдагы "Сенная площадь" жана "Технологический институт" метро станцияларындагы жардыруудан улам 14 киши набыт болуп, 50гө жакын адам түрдүү жаракаттарды алган.
