Sputnik Кыргызстан агенттиги Бишкек ШИИБдин Кылмыш иликтөө башкармалыгынын өкүлү, милициянын подполковниги Асан Токтомамбетовдун жардамы менен үй ууруларынан сактануу жана анын алдын алуу эрежелерин тизмектеди. "Сактансаң сактайм" демекчи, сак болуңуз.
Бир жакка кетип жатканда үйдү жакшылап бекитиңиз. Ошондой эле үйүңүздүн кулпусун тез-тезден алмаштырып турбасаңыз уурулар эшик ачкан жагынан чебер болуп калышкан. Аларда бир нече ачкычтын түрү бар, бири болбосо экинчиси менен ачып алышы ыктымал.
Сигнализация койдуруп алыңыз. Бишкек ШИИБдин алдындагы кайтаруу бөлүмү менен үй кожоюну келишим түзүп, эшигине, терезелерине сигнализация койдуруп алса болот. Бул белгинин жардамы менен ууруну милиция жеринен кармай алат.
Үйгө көп акча же баалуу буюмдарыңызды калтырбаңыз. Ууру баалуу буюм менен акча издейт эмеспи. Эрдиңизди кесе тиштеп калбайын десеңиз, сак болуңуз.
Видеокамера орнотуу ашыктык кылбайт. Колуңуздан келсе үйгө видеокамера орнотуп койсоңуз, келип кеткендерге байкоо салып турасыз. Андыктан акчаңызды аябай бир видеокөзөмөлдөгүч деле орнотуп койсоңуз ашыкча болбойт. Анткени көпчүлүк учурда уурулар изин жашырып, таптырбай кетишет эмеспи.
Күн ысыкта кечкисин терезелерди ачык таштабаңыз. Түшүнөбүз, эшик ысык, аба жетпей думугуп турасыз. Уурулар көпчүлүк учурда үйлөргө таңкы саат 4-5тер чамасында киришет. Бул учурда адамдардын баары катуу уйкуда болгон болот.
Жатаарда телефон, ноутбук же дагы башка баалуу буюмдарды өз бөлмөңүзгө алып кирип коюңуз. Сиз жыргап уктап жатканда ууру кирип башка бөлмөлөрдү акырын тинтип кетип калат. Ошондуктан жок дегенде телефон, ноутбуктарды өз бөлмөңөргө алып кирип койгула.
Күчүк багыңыз. Сигнализация же видеокамера орнотконго шартыңыз болбосо, жок дегенде ит багып алыңыз. Үйгө келген чоочун адамды ал дароо тааныйт. Андыктан бир жакка кетип жатсаңыз короонун ичине бош кое берип койсоңуз, анын да жардамы тийиши ыктымал.
Көп акчаңыз же өтө баалуу нерселериңиз бар экенин баарына эле айта берүүнүн кажети жок. Ууруну алыстан издебе дегендей, сиздин жашоо-шартыңызды билген эле киши келип, сызга отургузуп кетиши ыктымал.
