БИШКЕК, 7-мар. — Sputnik. Түндүк Кореянын лидери Ким Чен Ын стратегиялык күчтөргө атылган ракетадан улам кокустан чыгып кетчү согушка даяр турууга буйрук берди. Бул туурасында РИА Новости Кореянын борбордук телеграф агенттигине шилтеме кылып кабарлады.
Аталган агенттиктин маалыматына караганда, "Хвасон" деп аталган ракеталык аскердик машыгуу өтүп, анда Япониядагы америкалык базага сокку уруу "пландалган".
Буга чейин Түндүк Корея 6-мартта төрт ракета учуруп, анын үчөө Япониянын экономикалык аймагына түшүп калганы кабарланган.
Япониянын Коргоо министрлигинин маалыматына караганда, ракеталар Япон деңизинин аймагына Акита префектурасынын Ога деп аталган жарым аралына 300-350 чакырым аралыкта түшкөн. Баллистикалык ракеталардын келтирген зыяны туурасында маалыматтар түшө элек.
Түштүк Кореянын Аба күчтөрүнүн башкы штабынын жетекчилигинин айтымына караганда, ракеталар Япон деңизин карай Пхёнан-Пукто провинциясынан атылган. Ал миң чакырым аралыкты басып өткөн. Түштүк Кореянын тиешелүү күчтөрү ракеталар 260 чакырым бийиктикке көтөрүлгөндүгүн айтууда.
Пхеньяндын азыркы машыгуулары Түштүк Кореяда өтүп жаткан Америка-Корея ири машыгууларына дал келип калганын байкоого болот.
