БИШКЕК, 24-авг. — Sputnik. Президент Алмазбек Атамбаев адам өмүрүн алган зилзаладан улам Италия президентине көңүл айткандыгын өлкө башчынын маалымат кызматы билдирди.
Ага чейин Италиянын үч миң калкы бар Аматриче шаарынын мэри Серджио Пироццо дагы жер титирөөнүн айынан шаар талкаланганын билдирген.
Акыркы маалыматтар боюнча борбордук Италиядагы жер силкинүүнүн айынан 38 адам көз жумганы белгилүү болду. Бирок жан таслим болгондордун анык саны кыйла жогору экени айтылууда. Жүздөн ашык адамдын дайыны белгисиз.
"Болгон окуяны кыргыз эли терең кайгыруу менен кабыл алып, кайгыңыздарды тең бөлүшөт. Каза болгондордун үй-бүлөсүнө көңүл айтуу менен жаракат алгандардын батырак сакайып кетишин тилейт", — деп айтылат кайрылууда.
Кыргызстандын Тышкы иштери министрлигинин маалымат кызматы жабыркагандардын арасында КР жарандарынын бар-жогу такталып жатканын билдирди. Министрликтин маалымат департаментинин биринчи катчысы Айымкан Кулукееванын айтымында, аталган маселени аныктоо КРдин Швейцариядагы элчилигине тапшырылды.
