БИШКЕК, 24-авг. — Sputnik. Катуу жер титирөөнүн очогунан эки чакырым алыстыкта жайгашкан Италиянын Аккумоли шаары жарым-жартылай кыйрап калгандыгы тууралуу шаар мэри Стефано Петруччи журналисттерге телефон аркылуу билдиргенин РИА Новости жазып чыкты.
Маалыматка караганда шаарда жашаган 700гө чукул жарандын көпчүлүгү уранды алдында калышкан.
Буга чейин Италиянын үч миң калкы бар Аматриче шаарынын мэри Серджио Пироццо дагы жер титирөөнүн айынан шаар талкаланганын билдирген.
Магнитудасы 6,0гө жеткен биринчи жер титирөө саат 3.36да Аккумоли шаарына жакын жерде катталган. Магнитудасы 5,4кө жеткен экинчи силкинүү саат 4.34 чамасында Умбрия облусунда болгон.
Табигый кырсыктын айынан Аккумоли жана Аматриче шаарларынан сырткары Лацио, Умбрия жана Марке облустарында дагы кыйроолор болгон. Өлкө бийлиги жашоочуларды жабыркагандар үчүн кан тапшырууга чакырды.
Россия менен Германия биринчилерден болуп Италияга жардам берүүгө даяр экендиктерин билдиришти.
Кыргызстандын Тышкы иштери министрлигинин маалымат кызматы жабыркагандардын арасында КР жарандарынын бар-жогу такталып жатканын билдирди. Министрликтин маалымат департаментинин биринчи катчысы Айымкан Кулукееванын айтымында, аталган маселени аныктоо КРдин Швейцариядагы элчилигине тапшырылды.
"Италияда дипломатиялык өкүлчүлүк жок болгондуктан, бул маселени тактоо иши Швейцариядагы элчиликке жүктөлдү", — деди ал.
Жер титирөөнүн себептери тууралуу Sputnik Кыргызстан агенттиги даярдаган инфографикадан окуңуз>>
