БИШКЕК, 27-июл. — Sputnik. Маданият, маалымат жана туризм министринин милдетин бүгүнтөн баштап Кыргыз эл артисти Түгөлбай Казаков аткармай болду. Аны министрликтин жамаатына өкмөт аппаратынын жетекчиси Акылбек Осмоналиев тааныштырды.
Эске сала кетсек, мурунку министр Алтынбек Максутов өз ыктыяры менен арыз жазып, жумуштан кеткен.
2014-жылдын октябрь айынан 2016-жылдын жай мезгилине чейин аталган министрликти жетектеп келген Максутов эмнеси менен элдин эсинде калды?
- Максутов министрликке чейин бир дагы мамлекеттик кызматта иштеген эмес;
- Жаңы гана креслого отурганда Сочидеги "тарзанкадан" секирип, "дүң" болгон;
- Министрлик кызматтын түгөнбөс түйшүгүнөн чарчаганда жеке өнөрканасына барып, чыгармачылык менен алектенери айтыла калчу;
- Анын тушунда премьер-министр баштаган өкмөт мүчөлөрү концерттерге барып, Абдылас Малдыбаев атындагы опера жана балет театрынын актерлорунун айлык акысы көтөрүлгөн;
- Максутовдун мурунку орун басары пара берип жатып УКМКга кармалган.
- Мамлекеттик тарых музейинин капиталдык ремонту башталган. Жакшы саамалыкка сүйүнүп бүтө электе имараттан өрт чыгып, кырсык болду.
Ал эми бүгүн дайындалган жаңы министрди курдаштары кызуу куттуктаганча Sputnik Кыргызстан агенттиги Түгөлбай Казаков тууралуу анча-мынча фактыны тизмектөөнү эп көрдү.
- Классикага айланып калган чыгармаларды жаратып ("Алтын балалык", "Насыйкат", "Жамгыр төктү", "Ак шумкар", "Элегия", "Шуулдаба, теректерим" ж.б.), бир топ ырчынын багын ачкан;
- Казаковго Токтогул сыйлыгы берилбей калып коомчулукта катуу талкуу жаралган;
- "Эл сага кол чапкандан тажай элек кезде сахнадан кеткен оң" деген сөзү бар;
- КТРКдагы "Улутман" телекөрсөтүүсүнүн редактору жана алып баруучусу болуп иштеген;
- Көп жыл мурун Маданият, маалымат жана туризм министринин орун басарлыгын аркалаган;
- Туңгуч президент Аскар Акаевдин тушунда Жогорку Кеңештин депутаттыгына ат салышкан.
