БИШКЕК, 23-июл. — Sputnik. Өрт чыккан Мамлекеттик Тарых музейинин имаратынан экспонаттарды көчүрүп чыга башташты. Бул туурасында Бишкек мэриясынын маалымат кызматынын жетекчиси Гуля Алмамбетова билдирди.
Буга чейин ӨКМ Бишкектин борборунда жайгашкан Тарых музейи өрттөнүп жаткандыгын билдирген. Алдын ала берилген маалыматтарда, музейдин кампасы өрттөнүп, адам өмүрүнө зыян келбегендиги айтылган.
Буга чейин имаратка кол кап жана бет капчан адамдарды киргендиги кабарланган. Анын айтымында, ал адамдар — экспонаттарды алып чыгуу үчүн кирген музейдин кызматкерлери менен ӨКМдин аскерлери.
"Учурда бири-бирин алмаштырып 30га чукул киши иштеп жатат. Кычкылтектин жетишпегендигинен улам, кыйынчылык жаралып жаткан. Азыр ал маселе чечилди", — деди Алмамбетова.
Ал эвакуация иштери алдын алуу, сактыктан улам жүргүзүлүп жаткандыгын, негизи экспонаттарга кооптуулук жаралбагандыгын айтты.
"Азырынча түтүндүн кайдан келип жаткандыгы түшүнүксүз болуп жатат. Акыркы маалыматтарга караганда, ал биринчи кабаттын дубалдарынан чыгууда. Азырынча анын себеби белгисиз", — деди ал.
Тилсиз жоо тууралуу кабар "101" кызматына түнкү саат 10дөн өткөндөн кийин келип түшкөн.
Мындан бир нече күн мурда тагыраагы, 14-июлда да музейдин чатырындагы 20 чарчы метр айнеккебез өрттөнгөн. Анын ширетүү иштеринде өрт коопсуздугу эрежелеринин бузулушунан улам болгондугу кабарланган.
Мамлекеттик Тарых музейи 1925-жылы негизделген. Ал эми азыркы имараты 1984-жылы салынган. Ал — Борбордук Азиядагы эң ири музейлердин бири. Бул жерде 135ге миңге чукул экспонаттар жана кыргыз элинин маданий, тарыхый уникалдуу эстеликтери сакталып келет.
