БИШКЕК, 11-июл.— Sputnik. Президент Алмазбек Атамбаев "Ипотекалык баалуу кагаздар жөнүндө" мыйзамга кол койду деп билдиришти мамлекет башчысынын маалымат кызматынан.
"Мыйзам ипотекалык баалуу кагаздардын эмиссиясында жана аларды жүгүртүүдө келип чыккан мамилелерди жөнгө салууга багытталган", — деп айтылат таратылган маалыматта.
Мыйзам Жогорку Кеңеши тарабынан 2016-жылдын 2-июнунда кабыл алынган.
Улуттук валютадагы жана чет өлкөлүк валютадагы акча каражаты ипотекалык жабууга анын өлчөмүнүн суммасынын 10 пайыздан ашпаган курамында кириши мүмкүн. Ипотекалык жабуу курамына кирген акча каражатынын учету жана сактоо тартибинин талаптары, ошондой эле ипотекалык жабууга киргизүүгө боло турган чет өлкөлүк валютанын тизмесин өкмөт бекитери айтылган.
"Мамлекеттик баалуу кагаздар ипотекалык жабуу курамына анын өлчөмүнүн 20 пайыздан ашпаган суммада кириши мүмкүн, мында аларды баалоочу тартибинин эсебин өкмөт бекитет", — деп айтылган.
Ипотекалык жабууга кирген мамлекеттик баалуу кагаздардын эсебинин тартибин Кыргызстандагы ченемдик укуктук актылары менен бекитилери белгиленген.
