БИШКЕК, 11-июл. — Sputnik. Казак бийлигин күч менен басып алууга шектелген ишкер Тохтар Тулешов бир катар оор жана өтө оор кылмыштарга катышы бар экени тууралуу Новости-Казакстан агенттиги өлкөнүн Улуттук коопсуздук комитетине шилтеме берүү менен жазып чыкты.
Дүйшөмбү күнү өткөн маалымат жыйындын алдында Улуттук коопсуздук комитети аталган иштин алкагында 25 адамга кылмыш иши козголгонун жана 300гө жакын адам күбө катары көрсөтмө бергенин билдирген. Мындан тышкары тергөө иштери Тулешовдун бир катар оор жана өтө оор кылмыштарга тиешеси бар экени аныктаганын дагы жарыялашкан.
"Анын кылмыштуу аракеттерине каршы Казакстандын Кылмыш жаза кодексинин 125, 126, 179, 182, 192, 262, 265, 266, 268, 287, 296, 367 жана 1997-жылы редакцияланган 96, 107, 187- беренелери боюнча кылмыш иши козголгон", — деп айтылат маалыматта.
Мындан тышкары Тулешов улуттар аралык кылмыштуу топту каржылоого жана куралдуу топту түзүүгө шектелип жатат.
Маалыматка караганда ал башкарган кылмыштуу топ анын буйрутмасы менен адам өлтүрүү, уурулук, жарандардын мүлктөрүн атайылап жок кылуу, каракчылык сыяктуу иштерди аткарып келишкени далилденген.
Тулешов январь айынын акырында Шымкенттин күч кызматкерлери тарабынан кармалып, анын жанынан бир нече баштык курал табылган.
Казакстандын Улуттук коопсуздук комитетинин июнь айында тараткан билдүүсүнө караганда Тулешов менен анын чоң мансапка ээ шериктештери бийликти күч менен тартып алууга бир катар чараларды көрүшкөн. Максатка жетүү үчүн алар жер реформасына каршы акцияларды уюштурушканы айтылат.
