БИШКЕК, 11-май — Sputnik. Кыргызстандын Кытай жана Монголия мамлекеттериндеги элчилиги Улан-Батор шаарында республиканын туристтик потенциалы жана Көчмөндөр оюндарына арналган атайын тегерек стол уюштурду. Бул тууралуу Тышкы иштер министрлиги билдирди.
Маалыматка ылайык, иш-чарага Монголиянын илимий чөйрөсүнүн өкүлдөрү, мамлекеттик органдар, туристтик компаниялар, жалпыга маалымдоо каражаттары катышкан.
"Жыйында элчи Канайым Бактыгулова кыргыз-монгол кызматташтыгынын келечеги кең экенин айтып, быйыл сентябрь айында Ысык-Көлдүн жээгинде Экинчи дүйнөлүк көчмөндөр оюндары тууралуу маалымат берди", — деп айтылат билдирүүдө.
Элчи ошондой эле монгол элин бул иш-чарага активдүү катышууга чакырган. Андан сырткары, Кыргызстандын ажайып кооз жерлери жана туристтик деңгээли тууралуу видео көрсөтүлүп, журнал, буклеттер таратылган.
