БИШКЕК, 28-янв. — Sputnik. Шаардык милиция дасыккан чөнтөк ууруну кармаганын Бишкек ШИИБдин маалымат кызматы билдирди.
Маалыматка ылайык, укук коргоо органдарына №136 маршруттук таксиден телефонун уурдаткан шаар тургуну арыз менен кайрылган.
Бул факты каттоого алынып, аталган кылмышка шектүү катары Нарын облусунун 22 жаштагы Эдил аттуу тургуну колго түштү. Анын жанынан ар кыл үлгүдөгү беш уюлдук телефон табылган.
Милиция кармалган жарандын буга чейин төрт ирет соттолгонун белгилейт. Сурак учурунда башка маршруттардан жасалган ушул сыяктуу уурулуктарын мойнуна алган.
Учурда ал убактылуу кармоочу жайга киргизилип, тергөө иштери улантылууда.
