БИШКЕК, 28-янв. — Sputnik. "Ислам мамлекетти" террористтик тобунун азгыруучуларынын ишмердүүлүгүн алгачкы чекте — социалдык тармактарда токтотуу керектигин Бишкек — Уфа видеокөпүрөдө "Евразиялыктар — жаңы толкун" филиалынын директору Владимир Лю билдирди.
Бейшемби күнү "Ислам мамлекетинин тармактык түзүмүнө жаштардын тартылышы: экстремисттик идеологияга каршы аракет жана соцтармактагы үндөөлөр менен кантип күрөшүү керек" деген темада видеокөпүрө өттү. Ага эксперттер менен жаштар катышты.
"Ислам мамлекетине" азгыруу иши негизинен социалдык тармактарда жүрөт. Биз аларга Интернеттен каршылык көрсөтүшүбүз керек", — деди Лю.
Анын айтымында, студенттер аталган көйгөйлөрдү талкуулап тим болбостон аларды чечүүгө да даяр.
"Биз сиздер менен биргеликте маалымат борборун түзсөк болот. Ал тармактардагы азгыруучулардын ишмердүүлүгүн карап, эсептеп, анализдөө менен алектенмек", — деди президенттин алдындагы Башкаруу академиясынын студенти Аманат Султангазиев.
Саясат таануучу Денис Бердаков видеокөпүрөнүн пайдалуу экендигин белгилеп, мындай иш-чара Кыргызстан менен Башкыртстандын жаштар арасындагы тажрыйба алмашууга өбөлгө болуп берерин кошумчалады.
