БИШКЕК, 28-янв. — Sputnik. Бишкектин салык кызматы төлөм жыйноо милдеттемелерин аткарган эмес. Бул тууралуу премьер-министр Темир Сариев мэриянын коллегиясында билдирди.
Өкмөт башчы салыкты тийиштүү көлөмдө жыйнабаган шаар жана район башкармалыктарынын ишин катуу сынга алды. Пландаштырылган көлөмгө 562 миллион сом жетпей калган.
"Былтыр ЕАЭБге кирүүдөн күтүлгөн салык төлөмдөрүн ала алган жокпуз. Киреше бөлүгүн ички резервдин эсебинен жаптык. Мындан тышкары, аны 16 миллиард сомго көбөйттүк", — деди Сариев.
Премьер-министр салык чогултууну жергиликтүү бийлик органдарына өткөрүп берүүгө мыйзам жол берерин эскертти.
"Мисалы, Жалал-Абад шаарында 80 миллион сомго көп же 20 пайызга ашык салык чогултулган", — деди өкмөт башчы.
Шаардын мэри Кулматов мындай сунушка каршы пикирин билдирди.
"Жалал-Абад — бул суунун бир тамчысы, системаны бузуп алышыбыз мүмкүн. Эксперимент жүргүзүүгө акыбыз барбы? Андан көрө салыкчыларды натыйжалуу иштетүү керек", — деди ал.
Муну менен бирге Кулматов айып пулдарды Бишкектин казынасына түшүрүп, муниципалитетке жүктөлгөн билим берүү чыгымын республикалык бюджетке өткөрүп берүүнү сунуштады.
"Билим берүүнү каржылоо менен биз мамлекеттик милдеттемелерди аткарып калып жатабыз", — деди мэр.
Бирок премьер-министр шаар башчысынын сунушун четке кагып, Бишкек өлкө ИДПнын үчтөн бирин түзөрүн белгиледи.
