БИШКЕК, 27-янв — Sputnik. Нарын облусунун жашоочулары өкмөткө бир нече талаптарды коюп, шаардын борборунда нааразычылыкка чыкты. Бул туурасында жергиликтүү тургун Бактыгул Исаев кабарлады.
Буга чейин облустун тургундары тоолуу аймактарынын жашоочуларынын айлык акысына кошуп төлөнүп келген каражаттын 50 пайызын алып салуу боюнча мыйзам долбооруна макул эместигин билдирип, нааразычылыкка чыгаарын айтышкан.
Мыйзам долбоору парламентке келип түшкөндөн кийин премьер-министр Темир Сариев дыкат анализ жүргүзүлбөгөндүгүн айтып, өкмөт документти чакыртып алган.
Кечээ парламентарийлер менен болгон жолугушууда нарындыктар негиз жок деп, митингге чыкпай тургандыгын билдиришкен.
Бактыгул Исаевдин айтымында, жергиликтүү эл аталган мыйзам долбоору ошол турушунда кабыл алынбай тургандыгы боюнча кагаз жүзүндө далил керек деп эсептейт.
"Нарындыктар кыш мезгилинде жылуулук үчүн карыз болгондордун электр кубатын өчүрбөй, төлөгөнгө мөөнөт берүүнү суранышууда. Кыш бул аймакта башка жактарга караганда катаал жана узак болот", — деди ал.
Өкмөттүн Нарын облусу боюнча өкүлүнүн маалымат катчысы Айнура Дүйшөк кызы Sputnik Кыргызстан маалымат агенттигине митинг тынч өтүп жаткандыгын жана элдин саны 400гө жакын экендигин айтты.
Анын айтымында, турак-жай жана автоунааларды камсыздандыруу боюнча маселе да көтөрүлгөн.
"Митингге чыккандар турак-жайды менчик эмес, мамлекеттик компания камсыздандырышы керек дешти. Андан сырткары автоуааналарды камсыздандырууну таптакыр эле жоюп салууну талап кылышууда", — деди ал.
Митинг катышуучусу Исаев эл өкмөт башчы Сариев келбей койгондугуна нааразы болгондугун айтты.
Өкмөттүн маалымат кызматынын жетекчиси Назира Ахмедова премьер-министр жакында эле Нарын облусунда болуп кеткендигин, эртең аталган аймакка биринчи вице-премьер Аалы Карашев бара тургандыгын билдирди.
