БИШКЕК, 25-янв. — Sputnik. Өкмөт тоолуу шартта жана алыскы аймактарда иштеген жарандарга кошумча акы төлөөнү алып салууну сунуштаган мыйзам долбоорун чакыртып алды. Бул туурасында өкмөттүн маалымат кызматы билдирди.
Премьер-министр Темир Сариев дүйшөмбү күнү жыйын өткөрүп, министрлик жана мекеме жетекчилери менен аталган мыйзам долбоорун талкуулады.
Анда өкмөт башчы бул мыйзам долбоору бийик тоолуу жана жетүүгө оор аймактарда жашаган калкка даректүү социалдык колдоо көрсөтүүгө багытталышы керектигин белгиледи.
"Эмгек министрлиги аталган мыйзам долбоорун иштеп чыгууда комплекстүү анализди жетиштүү деңгээлде жүргүзгөн эмес. Өлкө үчүн пайдалуу чаралар терең ойлонулуп, дыкат эсептерге таянышы керек", — деди Сариев.
Премьер-министр долбоорду иштеп чыгууда тийиштүү мекеме аймактардын социалдык-экономикалык абалына байланышкан маселелерди толук камтыбаганын кошумчалады.
Жыйын соңу менен аталган мыйзам долбоорун чакыртып алып, бардык аспектилерди эске алуу менен толук иштеп чыгуу тапшырылды.
