БИШКЕК, 23-дек. — Sputnik. Нарында көмүрдүн бир тоннасын 3500 сомдон тургундардын үйлөрүнө чейин жеткирип жатат. Бул тууралуу өкмөттүн Нарын облусундагы өкүлчүлүгү билдирди.
Маалыматка ылайык, 22-декабрда Нарын шаарынын борбордук аянтына сегиз жүк ташуучу автоунаа менен Кара-Кечеден көмүр алып келинди. Мындай иш аракеттер калкты көмүр менен камсыздоо максатында ыйгарым укуктуу өкүл Аманбай Кайыповдун демилгеси менен өкмөттүн Нарын облусундагы ыйгарым укуктуу өкүлүнүн аппараты, "Кыргыз Көмүр" мамлекеттик ишканасы жана жеке ишкер тарабынан түзүлгөн үч тараптуу келишимдин негизинде жүргүзүлүүдө.
Аманбай Кайыповдун айтымында облуста көмүрдүн баасы 4000 сомго чейин кымбаттап кетүүдө.
"Калкыбызга жеңилдик болсун деп үч тараптуу келишим түздүк. Анын негизинде кардарлар канча тонна көмүр керектелерин билдирсе, облустун кайсыл аймагы болбосун баасын 3500 сомдон ашырбай үйүнө сапаттуу отун түшүрүп беребиз", — деди ал.
Белгилей кетсек, Нарын облусу республиканын эң суук аймагы болуп эсептелет. Тоолуу аймактарда кышында суук 40 градуска чейин жетет.
