БИШКЕК, 17-дек. — Sputnik. Режиссер Элнура Осмоналиеванын "Сейде" аттуу тасмасы АКШда өтө турган "Сандэнс" эл аралык кинофестивалына катышуу үчүн тандалып алынганын Кинематографты өнүктүрүү фонду билдирди.
Маалыматка ылайык, 1981-жылдан бери өткөрүлүп келе жаткан фестиваль кийинки жылдын 21-31-январь күндөрү Юта штатынын төрт калаасында өтүп, ага жалпы жонунан 13 тасма катышат.
"Сейде" аталган эл аралык иш-чаранын сынагына катышып жаткан экинчи кыргызстандык тасма — 1999-жылы режиссер Актан Арым Кубаттын "Бешкемпир" тасмасы фестивалдын толук метраждуу фильмдеринин конкурсуна катышкан.
14 мүнөткө созулган кыска метраждуу тасма алыска айылда жашаган Сейде аттуу кыз менен анын жакшы көргөн аты туурасындагы окуяны баяндайт.
Аталган тасма үстүбүздөгү жылдын сентябрь айында Венецияда өткөн "Горизонты" эл аралык фестивалында да ат салышкан.
