БИШКЕК, 14-дек. — Sputnik. Режиссер Мирлан Абдыкалыковдун "Сүтак" тасмасы Уфа шаарында өткөн Улуттук жана этникалык кинонун II Эл аралык "Күмүш Акбозат" фестивалында "Мыкты режиссура" номинациясында жеңишке жетишкенин Кинематографияны өнүктүрүү фонду билдирди.
Маалыматка ылайык, аталган кинофестиваль үстүбүздөгү жылдын 9-12-декабрь күндөрү өткөн. Анын негизги сынагына Мирлан Абдыкалыковдун "Сүтак" тасмасы катышса, ШКУ мамлекеттеринин кинематографына арналган бөлүктө Далмира Тилепбергенованын "Асман алдында" жана Чолпонай Бөрүбаеванын "Топурак" тасмасы ат салышкан. Ал эми Асел Жураеванын "Лампа" фильми конкурстан тыш тартууланды.
Фестивалдын баш байгесин россиялык режиссер Кирилл Плетневдин "Настя" аттуу тасмасы багындырды.
Ходжакули Нарлиев жетектеген калыстар тобунун курамында кыргызстандык кино тануучу, режиссер Гүлбара Төлөмүшова да болду.
Буга чейин бир катар абройлуу кинофестивалдарда жеңишке жетишип, "Оскар" сыйлыгына "Мыкты чет элдик тасма" катары талапкер болуп жаткан "Сүтак" тасмасы адамдардын ортосундагы таза мамилелер, аруу сезимдер, ыйык каада-салтты баяндайт.
