БИШКЕК, 6-дек. — Sputnik. ДАИШ эл аралык террористтик тобу көзөмөлүндөгү айрым аймактын чыгып кетишинен улам акча маселесинен кыйналып жатканын The Washington Post жазып чыкты.
Маалыматка ылайык, аталган уюм акыркы эки жыл ичинде кирешесин мүлктү тартып алуунун эсебинен камсыздап келген.
"Бул өтө туруксуз булак", — дейт Бригам университетинин доценти Янга Квинн Мичан.
Басылма учурда ДАИШтин финансылык абалы тууралуу так маалымат жок экенин белгилейт. АКШнын мамдепартаменти билдиргендей, нефть сатуудан түшкөн күнүмдүк киреше буга чейин 1-1,5 миллион долларды түзүп келген.
ДАИШ учурда дүйнөлүк коопсуздукка коркунуч туудурган террористтик уюм болуп саналат. Үч жылдын аралыгында уюм Ирак менен Сириянын айрым аймактарын басып алууга жетишкен. Мындан тышкары, ДАИШ өз таасирин Түндүк Африка, негизинен Ливия аймагына жайылтууга аракет көрүп келет.
