БИШКЕК, 13-окт.— Sputnik. Япониянын Окинава префектурасынын губернатору Наго шаарына жакын жердеги Хэноко кыштагында АКШнын Аскердик аба күчтөрүнүн жаңы аэродромун курууга берилген уруксатты расмий алып таштады.
Киодо агенттигинин маалыматына ылайык, губернатор Такэси Онага өзүнүн чечими жөнүндө билдирүүнү Япониянын Коргоо министрлигинин Окинавадагы бөлүмүнө жөнөткөн.
Окинаванын калкы буга каршы чыгып, ошол себептен губернатор Онага бир нече жыл мурун өзүнүн шайлоо алдындагы өнөктүгү учурунда өзүнөн мурунку губернатор Хирокадзу Накаима убада кылган жаңы аэродромду куруу планын алып салууга жетишем деп сөз берген эле. Япониянын борбордук бийлигинин азыркы губернаторду муну жасабоого көндүрөлү деген аракеттеринен эч натыйжа чыккан жок.
Окинава өлкө аймагынын 0,6 гана пайызын ээлегени менен, ал жерде америкалык аскер объектилеринин 74 пайызы жайгашкан.
Префектуранын администрациясынын маалыматына боюнча, Окинавада 25,8 миң америкалык аскер кызматкери жана алардын 19 миң үй-бүлө мүчөлөрү менен АКШнын жарандык кызматтагы адамдары жашайт.
