БИШКЕК, 23-сен. — Sputnik. Молдова "Sputnik.Окуулар" поэзиялык эстафетасын улантты. Анын жүрүшүндө Молдованын белгилүү саясатчылары, коомдук ишмерлери, спорт чеберлери, музыканттары жана сүрөтчүлөрү өлкөнүн атактуу акындарынын чыгармаларын окуйт. Эстафетаны Молдованын эл артисти Константин Москович баштап, най деп аталган улуттук аспаптын коштоосунда өлкөнүн белгилүү акыны Григоре Виерунун "Graiul meu" ("Эне тили") аттуу ырын аткарып берди.
Sputnik Молдова – "Sputnik.Окуулар" долбоорунун алкагында жүрүп жаткан поэтикалык эстафетанын экинчи катышуучусу. 2015-жылдын март айында Sputnik Кыргызстан баштаган бул эстафета республикада кеңири колдоого алынган. Ага өлкөнүн премьер-министри Темир Сариев, вице-премьер Дамира Ниязалиева, Жогорку Кеңештин депутаты Жылдызкан Жолдошова, Кыргызстандын эл акыны жана мамлекеттик сыйлыгынын лауреаты Вячеслав Шаповалов, кинорежиссер жана "Айтыш" коомдук фондунун негиздөөчүсү Садык Шер-Нияз катышкан.
"Sputnik.Окуулар" долбоорунун алкагында Молдовада бир нече ай бою өлкөнүн белгилүү саясатчылары, коомдук ишмерлери, спорт чеберлери, музыканттары жана сүрөтчүлөрү өлкөнүн атактуу акындарынын поэзиялык видео кайрылууларын сунуштайт. Поэзиялык акцияга бардык каалоочулар жергиликтүү акындардын ырларын окуп социалдык тармактарга чыгаруу менен катыша алат", — деп белгиледи Sputnik Молдова эл аралык маалымат агенттиги жана радиосунун жетекчиси Владимир Новосадюк.
Константин Московичтин айтымында, Молдовада "Sputnik.Окуулар" эстафетасын ачуу ага тапшырылганына кубанычта.
"Graiul meu" аттуу ырдын мен үчүн мааниси чоң. Автор чыгармасында эне тилине, үйүнө, өлкөсүнө, өз элине, молдова жеринин ажайып кооз табиятына болгон улуу сүйүүсүн берген", — деди ал.
Sputnik — ондогон өлкөлөрдө мультимедиялык маалыматтык хабдарга ээ маалымат агенттиги болуп саналат. Sputnik өзүнө сайттарды, аналогдук жана санарип радиоберүүнү, мобилдүү тиркемелерди жана социалдык тармактарда баракчаларды камтыйт. Атайын жазылгандар үчүн Sputnik күнү-түнү англис, араб, испан жана кытай тилдеринде чыгат.
Константин Яковлевич Москович — Молдова Республикасынын эл артисти, искусство чебери, маданият тармагындагы сиңирген эмгеги үчүн мамлекеттик "Meritul civic" медалына, "Gloria Muncii" орденине жана Эл аралык Низами Гянджеви сыйлыгына татыган. "Витебскидеги Славян базары" фестивалынын Молдова менен Румыниянын аймагындагы расмий өкүлү.
