БИШКЕК, 17-сен. – Sputnik. Президент Алмазбек Атамбаев "Датка — Кемин" долбоорунун ийгиликтүү аякташына кошкон салымы үчүн Кыргызстандын энергетиктерине жана кытайлык өнөктөштөргө сыйлык ыйгарганын өлкө башчынын маалымат кызматы билдирди.
Президенттин буйругу менен КРнын энергетикалык көз карандысыздыгын камсыз кылууга жана мамлекеттин экономикалык потенциалын жогорулатууга кошкон зор салымы "Кыргызстандын улуттук электр тармагы" ишканасынын башкы директору Медетбек Айткулов III даражадагы "Манас" ордени менен сыйланды.
Мындан тышкары, Кытайдын тышкы иштер министри Ван И жана коммерция министри Гао Хученге "Данакер" ордени ыйгарылды.
"Даңк" медалы менен "Кыргызстандын улуттук электр тармагы" ишканасынын филиалы — Нарын жогорку вольттуу электр тармактары ишканасынын аба линиялары кызматынын электр монтеру Казыбек Көбөнбаев сыйланды.
Андан сырткары, "Даңк" медалына "ТВЕА" компаниясынын президенти, директорлор кеңешинин төрагасы Джан Синь ээ болсо, аталган компаниянын Кыргызстандагы өкүлү Макелек Мусаджан Ардак грамота менен сыйланды.
2011-жылы Кыргызстанда президент Алмазбек Атамбаевдин демилгеси менен өлкөдө көз карандысыз энергетикалык алкак түзүү боюнча масштабдуу долбоор башталган.
