Кишини сүзүп алгандар ага жардам бербестен, жол жээгине сүйрөп чыгарып коюшкан

БИШКЕК, 25-авг. — Sputnik. Талас РИИБдин ыкчам иликтөө тобу кишини сүзүп, окуя болгон жерден качып кеткен айдоочуну кармады. Бул тууралуу ИИМдин маалымат кызматы билдирет.

19-августта болжол менен кечки саат 9:00 чамасында Тараз – Талас – Суусамыр кан жолунун 102 чакырымында жол жээгинен 35-40 жашардагы  азиялык улуттагы кишинин сөөгү табылган.

Текшерүүлөрдүн жыйынтыгында ал автомашина сүзүп кеткенден кийин каза болгону аныкталган. Аны сүзүп кеткенден кийин жол жээгине сүйрөп чыгарып коюшкан. Кырсык болгон жерде машинанын фараларынын сыныктары табылган. Аталган фактка байланыштуу Кылмыш жаза кодексинин 281-беренеси (Жолдо жүрүү коопсуздугун жана транспортту пайдалануу эрежесин бузуу) боюнча кылмыш иши козголгон.

Кылмыш ишине тийиштиги бар делген шектүүлөрдү Талас РИИБдин ыкчам иликтөө тобунун кызматкелери издеп, үч күндүн ичинде табышкан. Шектүү катары Бакай-Ата районунун 18 жаштагы тургуну кармалган. Кырсык болгон учурда ал "Хонда-Фит" үлгүсүндөгү автомашинаны эч кандай уруксат берүүчү документи жок эле айдап жүргөн.

Кишини сүзүп кеткенде, автомашинанын ичинде анын ата-энеси да бар болгон. Алар Талас шаарынан атактуу ырчынын концертинен кайтып келе жатышкан. Сүзүп алган бейтааныш кишиге  жардам берүнүн ордуна, аны жолдун четине сүйрөп чыгып, таштап кетишкен. Алдын ала маалыматтарга ылайык, кишини сүзүп кеткенден кийин ал бир канча убакытка чейин тирүү болчу. Каза болгон жаран 1975-жылы туулган Талас шаарынын тургуну экени аныкталды.

Бул факты боюнча Кылмыш жаза кодексинин 121-беренесине (Коркунучта калтыруу) ылайык кылмыш иши козголду.

18 жаштагы айдоочу 1 айга камакка алынды.