БИШКЕК, 25-авг. — Sputnik. Бишкекте акушерлер жана медициналык колледждердин окутуучулары жаңы төрөлгөн ымыркайларды баштапкы реанимациялоо техникасын жана төрөттөн кийинки кан кетүүнү жөнгө салуу боюнча окутула турганын Саламаттык сактоо министрлиги билдирет.
"Кыргыз акушерлеринин альянсы" уюмунун президенти Чынара Казакбаеванын айтымында, мындай тренингдер жыл сайын өткөрүлүп келет. Мындан улам, республикада ымыркайдын периноталдык жана неонаталдык өлүмүн кыскартууга мүмкүнчүлүк түзүлдү.
"Тренингдин алгачкы эки күнү ымыркайларга арналса, калган күндөрү аялдардын төрөттөн кийинки кан кеткен учурларынын алдын алуу тууралуу окутулат", — Казакбаева.
Саламаттык сактоо министрлигинин маалыматында энелер көбүнесе төрөттөн кийинки кан кетүүдөн (38,7 пайыз) каза болушат. Андан кийин энелердин экстрагениталдык оорулардан (22,6 пайыз) жана сепсистен (16,1 пайыз) каза болгон учурлары көп кездешет.
