БИШКЕК, 29-июль — Sputnik. Облустук биргелешкен оорукананын реанимация бөлүмүнө жаткырылган ырчы Омардын абалы туруктуу бойдон сакталса, жакын арада башка бөлүмгө которулушу мүмкүндүгүн өздүк булактар билдирди.
ИИМдин билдирүүсүнө ылайык, Талас районунун тургуну Болот Бейшеналиев укук коргоо органдарына кайрылып, Бакай-Ата районунун тургуну Нуржан Токтогулов жана Өмүрбек Жанышев (Омар) андан 40 тонна төө буурчакты "акчасын кийин беребиз" деп алышканын айтып, бирок акчасын кайтарып бере электигин билдирген. Аталган факты боюнча 2015-жылдын апрель айында Кылмыш жаза кодексинин 166-беренеси ("Алдамчылык") боюнча кылмыш иши козголгон.
Булактын маалыматына ылайык, учурда Омардын абалы туруктуу, эч кандай коркунуч жарата турган абал жок. Эгер анын абалы ушул бойдон туруктуу сакталса, ал эртен башка бөлүмгө которулушу мүмкүн.
Талас райондук соту Омардын баш коргоо чарасын карап, аны бир ай камакка алуу чечимин чыгарган. Жогорку соттун маалымат кызматы билдиргендей, райондук соттун чечимине ылайык, Омар 26-августка чейин камакта калат.
