БИШКЕК, 11-июль — Sputnik. Президент Алмазбек Атамбаев Уфадагы ШКУнун саммитинен кечээ кечинде Бишкекке учуп келди. Бул туурасында президенттин маалымат кызматынын билдиришти.
Президент Шанхай Кызматташтык Уюмуна (ШКУ) мүчө-мамлекеттеринин Башчыларынын Кеңешинин кеңири курамдагы отурумуна катышты.
Россия президенти Владимир Путинге ШКУ мүчө-мамлекеттеринин башчыларынын Уфа шаарындагы отурумун мыкты уюштургандыгы жана меймандостугу үчүн ыраазычылык билдирди.
Жыйындын жыйынтыгында ШКУга мүчө-мамлекеттеринин жетекчилери тарабынан 16 документке кол коюлду. Анын арасында ШКУ мүчө-мамлекеттеринин Башчыларынын Кеңешинин Уфа декларациясы, 2025-жылдарга чейин ШКУну өнүктүрүү Стратегиясын бекитүү жөнүндө ШКУ мүчө-мамлекеттеринин Башчыларынын Кеңешинин чечими, Индия менен Пакистанды аталган уюмга кабыл алуу боюнча жана дагы бир топ чечимдер бар.
ШКУга Россия, Кытай, Казакстан, Кыргызстан, Тажикстан жана Өзбекстан мүчө. Афганистан, Индия, Иран, Монголия жана Пакистан өлкөлөрү байкоочу статусуна ээ. 2014-жылы Индия менен Пакистан уюмга кирүү тууралуу өтүнүчү менен кайрылган.
