БИШКЕК, 8-июль — Sputnik. Премьер-министр Темир Сариев иш планынын негизинде коргонуу-өнөр жай ишканалары "Дастан" улуттар аралык корпорациясы жана Мамлекеттик "Бишкек штамп заводуна" (БШЗ) барып, объектилердин жалпы абалы менен таанышканын өкмөттүн маалымат кызматы кабарлайт.
Маалыматка ылайык, Сариев ишканалардын жамааттары менен жолугуп, өндүрүш цехтери, андагы жабдыктарды көрүп чыкты.
Премьер-министр кыргыз өкмөтү коргонуу жана коопсуздук маселелерине өзгөчө көңүл бурарын билдирди.
"Биз бул ишканаларды колдошубуз керек. Акыркы 20 жыл ичинде заводдун иши токтоп, жабдуулар уурдалып, сатылып кеткен. Калыбына келтирүү иштери акыркы жылдары гана жандана баштады. Учурда бул тармактагы кадрлар маселеси курч турат, кадрларды даярдоо боюнча план иштелип чыгышы керек", — деди Сариев.
"Бишкек штамп заводу" мамлекеттик ишканасы жана "Дастан" эл аралык корпорациясы Кыргызстандагы дүйнөлүк рынокто атаандаштыкка жөндөмдүү аскердик өндүрүм чыгарган ишканалар болуп саналат. БШЗ Борбор Азиядагы атуучу куралга ок-дары чыгарган жалгыз ишкана болсо, "Дастан" деңиз куралын жана суу алдындагы техникалык каражаттарды өндүргөн алдыңкы корпорация болуп саналат.
