БИШКЕК, 8-июль — Sputnik. Президент Алмазбек Атамбаев Жалал-Абаддын Сузак районундагы Көк-Арт дарыясына курулган көпүрөнүн ачылышына катышканын өлкө башчысынын маалымат кызматы кабарлайт.
Көпүрө 1969-жылы курулуп, акыркы 20 жылдан бери бир да жолу капиталдык оңдоодон өткөн эмес. Бишкек-Ош автожолунун 564-чакырымында орун алган авариялык абалдагы көпүрө бузулуп, JICA агенттигинин грантына узундугу 89 метр келген жаңы көпүрө курулду. Аталган курулушка 12 миллион доллар жумшалды.
Президент Көк-Арт көпүрөсү мамлекет үчүн стратегиялык мааниге ээ экенин белгиледи.
"Бул көпүрө курулган жол республиканын бир топ аймактарын байланыштырып турат. Көпүрө куруу кыргыз элинде ар дайым бааланып келген. Ал достукту, жылуу мамилени чагылдырып турат. Көп улуттуу Кыргызстандын жаркын келечеги үчүн ар бир адам көпүрө болушу керек", — деди өлкө башчы.
Атамбаев өз сөзүндө Кыргызстанды техникалык жабдуу, гранттык каражат менен камсыздап, кызматташып келе жаткан JICA агенттигине ыраазычылык билдирди.
"JICA агенттигинин гранттык каражатынын эсебинен Чүй, Нарын, Ысык-Көл облустарында жол-эксплуатациялык ишканалардын жабдылышы күтүлүүдө. Ош-Баткен-Исфана унаа жолун калыбына келтирүү, Бишкек-Ош жолундагы кооптуу жерлерге коргогучтврды жана 700 метр келген тоннель куруу боюнча макулдашууга жетиштик. Бул иштердин бардыгына жалпы жонунан агенттик 116 миллион 470 миң доллар бөлүп жатат", — деди президент.
Өлкө башчысы эки жылдан кийин Чүй, Ысык-Көл, Нарын жана Жалал-Абад облустарын байланыштыра турган "Бишкек-Балыкчы-Казарман" альтернативалуу автотрассанын курулушу аяктай турганын кошумчалады.
