БИШКЕК, 8-июль — Sputnik. 119-маршруттук таксинин айдоочусунун 10у гана жол эрежеси боюнча экзаменди кайта тапшырганын Бишкек ИИББдин Жол кайгуул кызматынын маалымат кызматы билдирди.
Ошондой эле, жүргүнчү ташыган фирмаларды жеринен текшерүү иштери да жүргүзүлүп, анын жыйынтыгы боюнча эки фирманын ээсине 10 миң сом айып салынган.
"Жүргүнчүлөрдү ташуу менен алектенген көпчүлүк фирмалар ишке кичи автобусу бар айдоочуларды ала турганы текшерүү учурунда белгилүү болду. Айдоочу менен фирманын ортосундагы келишимге ылайык, жол эрежесин бузганда, жол кырсыкка учураганда бардык жоопкерчилик айдоочуга жүктөлөт", — деп айтылат билдирүүдө.
Жол кайгуул кызматынын билдиришинче, фирма жетекчилери жоопкерчиликти алышпайт.
Ошондой эле, транспорттордун техникалык абалы, ички жана тышкы көрүнүштөрү, өрткө каршы жабдуулары жок экенин Жол кайгуул кызматы белгилейт.
