БИШКЕК, 2-июль — Sputnik. Нарын облустук ооруканасынын дарыгерлери кадрлар маселеси курч турганда айлык акынын төмөндөшүнө нааразы болуп жатышканын Sputnik агенттигине шаардык кеңештин депутаты, анестезиолог-реаниматолог Эркин Сагындыкова билдирди.
Сагындыкова айлык акыны май айында эле кыскартуу каралганын, массалык нааразычылыктардан улам ал июнга калтырылганын белгиледи.
Саламаттык сактоо министрлигинин ченеми боюнча дарыгердин бир ставкасы 168 сааттан кем болбошу керек.
"Тилекке каршы, медиктер жетишпейт. Андыктан тийиштүү мөөнөттөн ашык иштөөгө туура келет. Эми бийик тоолуу аймактарда иштегенибиз үчүн, көп жылдык эмгек жана медициналык стаж үчүн төлөмдөр жоюлду. Натыйжада дарыгерлердин 15 миң сом айлыгынан 5 миңи кыскарып атат", — дейт дарыгер.
Сагындыкованын айтымында, дарыгерлер белгиленген мөөнөттөн көп иштешет. Бирок ченемден ашыкча аткарылган иш айкалыш жасалган катары гана бааланат.
"Бизге келген дарыгерлерге бир ставканын гана акчасы төлөнөт, демек, биз тийиштүү ченемден ашыкча бекер иштеген болуп жатабыз", — деп кошумчалады ал.
Бир ставка 8.00дөн 13.00гө чейин уланат. Мындан тышкары, түнкү смена бар. Ошон үчүн медкызматкерлер мөөнөттөн ашыкча иштеп жатабыз деп эсептешет.
"Доктурлар мындай жагдай улана берсе, бир ставкадан ашык иштебейбиз деп жатышат. Кадрлар жетишсиздигинен улам биз мөөнөттөн ашык иштеп келебиз. Башкы дарыгер Гиппократтын антын бергенсиңер, андыктан иштегиле деп коёт", — деди Сагындыкова.
Депутат Жогорку Кеңешке, тийиштүү министрликтерге кайрылуу жолдошконун, бирок алиге чейин эч кандай жыйынтык чыга электигин кошумчалады.
