БИШКЕК, 3 июнь — Sputnik. "Альфа Телеком" ЖАК (MegaCom соода маркасы) 2015-2017-жылдары менчиктештириле турган объектилердин тизмеси Жогорку Кеңеш тарабынан бекитилгенден кийин аукционго коюла турганын КР Экономика министри Олег Панкратов билдирди.
MegaCom уюлдук компаниясын сатыкка чыгаруу тууралуу маалымат өкмөттүн шейшемби күнкү жыйынында ачыкка чыкты. Ага учурда мамлекет компаниянын өнүгүшү үчүн сарптала турган чыгымдарды көтөрө албай тургандыгы себеп болууда.
Панкратовдун айтымында, "Альфа Телеком" ЖАК тизмеге кирген объектилердин катарында турат.
"Бүгүнкү күндө менчиктештириле турган ишканалардын тизмесин Жогорку Кеңеш бекиткендиктен, "Альфа Телеком" ЖАК сатыкка коюу үчүн парламенттин макулдугу керек. Учурда компания жеке менчик уюлдук фирмаларга атаандаш боло албайт. Мамлекет бул жарышта жеңилип калат", — деди министр.
Панкратов өлкөнүн аталган рыноктон чыгышы керектигин белгилеп, базар экономикасы мамлекеттин кийлигишпөөсүн талап кыларын айтты.
"Менчиктештириле турган объектилердин тизмеси жазылган документ азыркы чакырылыщтагы парламенттин кароосуна жиберилет", — деп белгиледи министр.
Эксперт Алмазбек Исаевдин пикиринде, өкмөттүн бул чечимин эки тараптуу кабыл алууга болот.
"Компанияны, өзгөчө шайлоо алдында, сатыкка чыгаруу күмөн ойлорду жаратат. MegaCom азыр эмес, эки жылдын аралыгында менчиктештирүү керек", — дейт эксперт.
Исаев Жогорку Кеңеш менчиктештирүүгө макулдугун берген учурда аукцион ачык-айкын өтүшү керектигин кошумчалады.
"Үлгү катары ЖМК жана БӨУ катышуусу менен өткөн кен жерлери сатылган аукциондорду алууга болот", — деп белгилейт эксперт.
"Альфа Телеком" ЖАК 2009-жылдын июнь айында түзүлгөн. Ээси Алексей Елисеев болгон. Убактылуу өкмөт 2010-жылдын май айында "Альфа Телеком" ЖАК акциясынын 49 пайызын улутташтырган. Калган 51 пайызы Елисеевдин менчигиндеги Southfield Management Inc. и Vesatel Unitеd Limited компаниясынын ээлигинде калган. Өткөн жылдын июль айында акциялардын 51 пайызы аресттен чыгарылган. Бул мамлекетке ишкана акцияларынын 100 пайызына ээлик кылуусуна мүмкүнчүлүк берген.
Комапниянын өткөн жылкы кирешеси 2 миллиарддан ашуун сомду түзөт.
