БИШКЕК, 18-май — Sputnik. Улуттук Госпиталдын Нефрология бөлүмүнүн башчысы, Кыргызстандагы бөйрөк трансплантациясынан кийинки бейтаптарды караган Казыбек Жолдошов күтүлбөгөн кокустуктан көз жумганын мекеменин башкы дарыгери Орозалы Көчөров билдирди.
"Казыбек Жолдошов бөйрөгү алмаштырылган бейтаптарды дарылаган КРдеги жалгыз дарыгер болчу. Улуттук медицина чоң жоготууга учурады. 36 жаштагы Жолдошов Арашан айылынын жанында болгон кокустуктан каза болду", — деди Көчөров.
Арашан айылынын аймагында жекшемби күнү эмгек жамааты менен чогуу эс алууга чыгып, агыны катуу сууга түшүп кеткен. Жолдошов сууга кулаганда жаракат алышы мүмкүндүгүн айткан Улуттук госпиталдын башкы дарыгери, ал суудан өз алдынча чыга албай калганын белгиледи.
Кесиптештери аны суудан чыгарууга аракет кылышкан, бирок агыны катуу тоо суусу аны алып кеткен.
"Маркумдун сөөгү 500 метр ылдый аралыктан табылды",— деди Көчөров.
Дарыгердин сөөгү кичи мекени Ош облусуна коюлат. Анын артында кичинекей кызы жана аялы калды.
КРдин Өзгөчө кырдаалдар министрлиги болгон окуя тууралуу маалымат келип түшпөгөнүн билдирди.
