Окуя кандайча болгонун камерадагы убакыт 04:29:23тү көрсөткөн жеринен тарта байкоого болот. Видео жазылмага караганда, BMW катуу ылдамдык менен баратып Lexus автосун сүзгөн. Бир нече убактан кийин жерине Тез жардам унаасы келген.
Тартип сактоо органдарындагы маалымат булагы окуяга күбө болгондордун айтымына таянып, BMW өтө катуу ылдамдыкта өткөндүгүн билдирди.
Эскерте кетсек, 7-июлда таңга жуук Чолпон-Ата шаарына жакын жайгашкан Бактуу-Долоноту айылында Lexus ES 330 жана BMW Х-7 автоунаалары кагышкан. Анын кесепетинен жеңил унаадагы төрт жигит каза болгон. Ал эми кроссоверде Жогорку Кеңештин депутаты Алиярбек Абжалиевдин уулу, Бишкек шаардык кеңешинин депутаты Темирлан Токобеков отурганы белгилүү болду.
Милиция BMW Х-7 унаасын Чүй облусунун 23 жаштагы тургуну айдап келе жатканын билдирген.
Токобековдун өкүлү автоунаа Бишкектеги BMW борборуна таандык экендигин айтты.
