Sputnik Кыргызстан агенттигинин кабарчысы ал адамды таап, жашоосу жана жумушу тууралуу материал даярдады.
"Базар, маршруткалардан элдин көбү "жаңы үйрөнчүктөргө" деп 1000-5000 сомго чейинки комуздарды алышат. Ал эми кымбат өрүк комуздарга көбүнчө артисттер буйрутма беришет. Алар 10 000-20 000ге чейин сатылат. Кээде акчасы жок, бирок таланты барларды байкап, аларга бекер эле берип коем", — деди Пазылов.
Акындык да өнөргө ээ Пазылов ырдап, жамактап, комузун мактап отуруп күнүнө 4-5 комуз сатып, 3 миңден 10 000 сомго чейин каражат таба алат. Бирок комузду сатканга караганда, жасоо кыйын дейт.
"Мурда аны жасаганга жардамчылар бар болчу. Азыр өзүм жалгыз эле иштеп жатам. Кээде бир комузду төрт-беш күндөп жасап каласың. Комуз өзү баалуу буюм болгондуктан жакшы эле каражат түшөт, бирок түшкөн кирешенин көбү материалдарга, ижара акысына кетип калат", — деди уста.
Комуздан тышкары гитара, мандалин жана үй эмеректерин да жасай алаарын айткан уста жакында жыгач иштеткен цех ачсам деген ой-тилеги бар.
