БИШКЕК, 30-янв. — Sputnik. Бишкектеги бир катар кичи райондордун тургундары Sputnik Кыргызстан агенттигинин Telegram тиркемесиндеги "Бишкек сегодня" тобуна үйлөрдөгү батареялар акырындык менен жылый баштаганын жазышууда.
30 Үчтүн айы 2018, 16:32
6-кичи райондун тургуну батарея 30 градуска ысыганын айтса, "Туңгуч", "Чыгыш-5" кичи райондору, Чыңгыз Айтматов проспектиси, Токтоналиев, Москва, Гоголь жана башка көчөлөрдөгү көп кабаттуу үйдүн тургундары дагы батареялар жылып жатканын айтышты.
Белгилей кетсек, бүгүн таңкы саат 4:40да Бишкек ТЭЦиндеги №3 блок ишке киргенин "Улуттук энергохолдинг компаниясы" ААКнын маалымат кызматы кабарлаган. Ага ылайык жаңы блок 150 МВт энергияны иштеп чыгып, +88 градуска чейин жылуулук берери айтылган. 29-январда системага суу толтуруу аракеттери башталган болчу.
